Дс, 20/06/2016 - 18:58
Қармақшы аудандық сотында БАҚ өкілдерінің қатысуымен «Есірткі заттарының заңсыз айналымына қатысты қылмыстық істер» тақырыбында брифинг өтті.
Брифингте сот төрағасы Қ.Абдуллаев: 2015 жылы соттың қарауына барлығы 172 қылмыстық іс түскен, соның ішінде 12 іс есірткі заттарымен қатысты. Бүгінгі күнге 48 іс келіп түссе, соның ішінде 9-і есірткі заттарымен байланысты. Нашақорлықпен, әсіресе, есірткі заттарын таратушылармен күрес өте өзекті күйінде қалып отыр. Ауданның құқық қорғау органдары заңсыз есірткі айналымымен күрес жұмыстарын тұрақты түрде жүргізіп келеді - деп, атап өтті.
Ол өз сөзінде бірнеше мысалдарға тоқталып өтті. Мәселен, қылмыстық іс құжаттары бойынша, 03 сәуір 2016 жылы жергілікті уақыт бойынша 01:00 дер шамасында Қармақшы АІІБ-нің қызметкерлерімен азамат Е. тоқтатылып тексеру барысында азамат Е-нің автокөлігінен газет жыртындысына оралған жасыл түсті ерекше иісі бар есірткі затына ұқсас зат табылып, айғақ ретінде алынып, қылмыстық теріс қылық жасағаны анықталды.
Сотталушы Е., Қазақстан Республикасы ҚК-нің 296 бабының 2 бөлігімен кінәлі деп танып, оған 80 /сексен/ сағат қоғамдық жұмысқа тарту жазасы тағайындалды.
Сот төрағасы өз сөзін қорытындылай келе жоғарыда баяндалған жайттар есірткі заттарын заңсыз таратушылардың жазасыз қалмайтындығын дәлел болып табылатындығын атап өтті.